الثلاثاء، ٢٥ ابريل، ٢٠١٧ 

الحياه

التاكسى

احمد ابو حسين

أحمد: سلام عليكم, شارع طلعت حرب

سواق التاكس: و عليكم السلام اتفضل...

أحمد: ياااه, هي السكة زحمة كدة ليه!!

سواق التاكس: المسيحيين, هو فيه غيرهم واقفين عند ماسبيرو   و مش عايزين يمشوا! 

أحمد: هاهاها، المسيحيين كلهم عند ماسبيرو ده على كده المسيحيين طلعوا قليلين قوي!

سواق التاكس: لأ اللي مدايقيين على الكنيسة اللي اتحرقت، في ناس اتعرضتلهم و ده غلط طبعا بس بصراحة هم اللي جابوه لنفسهم.

أحمد: مش فاهم! يعني تقصد حرق الكنيسة؟

سواق التاكس: المسيحيين بقوا مستأويين و مش فاهمين ان المسلمين لو حاوطوهم حيكلوهم و بعدين دول واخدين حقوقهم أكتر من المسلمين. 

أحمد: انت تعرف ان المسيحيين عشان يبنوا كنيسة محتاجين تصريح من رئاسة الجمهورية. في حين ان المسلمين بيبنوا زوايا في أي حتة.

سواق التاكس: و هم يبنوا كنائس ليه هو عددهم قد ايه أصلا؟ 

أحمد: عددهم كتير! بس هو احنا بنتكلم على العدد؟؟ يعني دور العبادة لازم يبقى على قد عدد المصلين.

سواق التاكس: أيوة

أحمد: طب ممكن تقولي عدد المسلمين اللي بيصلوا في المسجد غير يوم الجمعة يبقى قد ايه

سواق التاكس ضحك و قال: لو جاب ثلاث صفوف يبقى خير قوي

أحمد: يبقى نهدم الجوامع! و لا نشوف الجوامع اللي بتفتح جانب بعض و نهدم واحد فيهم

سواق التاكس: فهمت.... ممكن أقلك حاجة يا أستاذ! أنا ساكن في امبابة و لي صحاب مسيحيين و بحبهم بس دلوقت مش طايق أشوفهم عشان بقيت بحس انهم مش بيحبونا على طول بيشتكوا من العيشة.. معاهم حق في حاجات أقنعتني الصراحة بس في حاجات مش قادرين يفهموا ان احنا بالذات المسلمين الغلابة طالع عينا فيها أكتر منهم و معنداش حد يجبلنا حقوقنا زي الكنيسة و ده غلط مفروض نشتكي كمصريين فاهمني؟. هل أنا كده وحش؟

أحمد: أنا معاك أنا كمان ساعات بتضايق من بعض المسيحيين لما بحس انهم مش حاسين بينا..  تعالى نسيبنا من كل اللي قلناه و حتقوله.. سؤال.. انت بتحب النبي عليه الصلاة و السلام؟

سواق التاكس سبحان الله في لحظة دمعت عيناه و قال: طبعا و هي دي عايزة كلام

أحمد: بص يا سيدي الرسول عليه الصلاة و السلام علمنا أن الأصل فينا الحب. و اننا نسعى الى حوائج الناس قبل ما يطلبوها. انت مش عايزهم يبنوا كنيسة بس المصطفى الرحيم فتحلهم مسجده كي يقيموا فيه و احتضنهم و أوصى بهم. و كان يمشي فيمسح على رؤوس أطفالهم. و أعتقد أن هؤلاء الأطفال كانوا بيبصوا لرجل جميل المنظر،  وشه فيه نور و مسحه على رؤوس الأطفال و تقبيلهم علامة رجل عطوف. بالحب يا أسطة غزى مولانا النبي القلوب. هل لما عذب و اتأذى في الطائف حمل لهم غير الحب؟ هل لما دخل مكة حمل لهم غير الحب؟  هل في تعامله مع عمه الذي لم يؤمن به حمل له غير الحب؟ و لم ينتهي أحمد من كلامه حتى غزى محمد بن عبد الله قلب السائق و قلب أحمد كمان. و دمعت العيون. اللي عايز أقوله ان النبي علمنا اننا نحب و نفتح قلبنا للناس و نحاول نفهمهم و نقبلهم و نبرهم. صدقني لو بادرنا بالحب حنحل مشاكلنا مع بعض كمصريين فعلا. 

سواق التاكس: مع الأسف ساعات بننسى و الحمد لله اننا بنفكر بعض. الغريب انك معارضتنيش على طول الخط و لا أيدتني على طول الخط مع ان شكلك متعلم و دي حاجة الناس مبقتش بتعملها.

أحمد: يقول مولانا الامام الشافعي رأيي صواب يحتمل الخطأ و رأي غيري خطأ يحتمل الصواب. و ده الامام الشافعي! يبقى أنا أكيد احتمالية ان رأيي يطلع صح ضعيفة شوية.. هاهاها.. سيبك انت، المهم انت حتعمل ايه قوللي؟؟

سواق التاكس: وعد والله حروح امبابة أصالح و أحضن صحابي المسيحيين و أعاملهم زي سيدنا النبي ربنا يجمعنا بيه على خير. و سبق بالخير و ان شاء الله يردوا بالخير.

أحمد:  ان شاء الله، طيب، الحمد لله .

أنا حنزل هنا

و أخذ أحمد يقول و هو في طريقه كي يعطي محاضرة عن العلوم السياسية لجمعية مسيحية ذو أغلبية عاملة مسلمة اسمها سبحان الله........ الرعاية بالمحبة... هاهاها... والله ده علم مش حلم

الحمد لله على سواقينك يا مصر. أصل اللي يسوق في مصر لازم يكون عنده أصل بس ندور كويس

ليست هناك فتنة بين أديان

بل صراع بين الحب و الكره

حرب بين فكر يدفعنا إلى الامام وجهل يدفع بنا إلى الخراب

------------------------------------------------------------
 

تحيا مصر، المجد للشهداء، كل المجد للشهداء

أقرأ المزيد لـ:  احمد ابو حسين

 

شارك

 

 

أضف تعليق

يرجى العلم بأن بياناتك الشخصية لن يمكن تقاسمها أو الكشف عنها لأي طرف ثالث، وسيتم الحفاظ على سريتها

 

رأي الجريدة

رسالة مفتوحة إلى دكتور محمد البرادعي

أنا أكنّ لك أقصى درجات الاحترام والتقدير. ولا يمكننا أبداً أن ننسى أن شجاعتك وبصيرتك كانتا وراء المطالبة بالتغيير والتحول إلى الديمقراطية خلال الأعوام...   قراءة المزيد

الدستور

فالدستور ليس مجرد وثيقة تضمن تساوينا كمواطنين أمام حاكم يحكمنا وفق قواعد محددة لا وفق أهوائه، بل هو مرآة الآمال، وعنوان القيم، وانعكاس للمستقبل الذي نحلم...   قراءة المزيد

المزيد

مش فاهم؟

مش فاهم؟

"مش فاهم؟" هو عدد من رسوم الكاريكاتير تم صياغتها في إطار كوميدي بهدف إثارة تساؤل محدد يشير الي وجود تناقض واضح أو تضارب في المصالح أو شيء غير صحيح، و لكن...  قراءة المزيد

المزيد

استطلاعات رأى

حذف كلمة مدنية من الدستور سيؤدي الي قيام
 دولة عسكرية
 دولة دينية
 دولة مدنية
 لا أهتم
هل تؤيد اقامة مباريات كرة القدم بجمهور ؟
 نعم
 لا
 لا أهتم